ជម្ងឺអាឡែកស៊ីច្រមុះជាអ្វី?

ការតឹងច្រមុះ រមាស់ច្រមុះ ហៀរសម្បោរ រមាស់ក្រអូមមាត់ រមាស់ក ឈឺក មានស្លេស្មច្រើន ឈឺក្បាល នេះអាចជារោគសញ្ញា នៃជម្ងឺអាឡែកស៊ីច្រមុះ។ ជម្ងឺអាឡែកស៊ីច្រមុះនេះ គេសង្កេតឃើញថា ២ភាគ៣នៃអ្នកជម្ងឺ ច្រើនតែកើតមានឡើងមុនអាយុ៣០ឆ្នាំ ហើយក្មេងៗឧស្សាហ៍កើតជាងមនុស្សចាស់។ ជម្ងឺនេះភាគច្រើនបង្កឡើងដោយសារបរិស្ថាន ឬអាចបណ្ដាលមកពីតំណពូជក៏ថាបាន។

-ជម្ងឺអាឡែកស៊ីច្រមុះជាអ្វី?

ជម្ងឺអាឡែកស៊ីច្រមុះគឺជាប្រភេទជម្ងឺដែលបណ្ដាលមកពីការរលាកច្រមុះ ឬផ្លូវដង្ហើមលើ ដោយសារសារធាតុផ្សេងៗ ជាពិសេសសារធាតុដែលមានក្នុងខ្យល់ធូលី លម្អងផ្កា ដែលគេហៅថា អាឡែកស្សែន។ នៅពេលដែលមនុស្សបញ្ចេញនូវគ្រឿង ការពារដែលហៅថាអង់ទីគ័រ ដើម្បីប្រឆាំងទប់ទល់នឹងអាឡែកស្សែនដែលមាននៅក្នុងខ្យល់រួចក៏បង្កើតបានជាជម្ងឺអាឡែកស៊ីច្រមុះនេះតែម្ដង។

-មូលហេតុបង្កអោយឡែកស៊ីច្រមុះ

មូលហេតុដែលបណ្ដាលឱ្យលោកអ្នកកើតមានជម្ងឺអាឡែកស៊ីច្រមុះនេះដោយសារតែកត្ដាធំៗពីរគឺ ៖

1 . តាមរដូវកាល ដល់ពេលមានការផ្លាស់ប្ដូររដូវទើបមានអាឡែកស៊ីច្រមុះកើតមានឡើង ហើយច្រើនតែកើតមានឡើង ដោយសារការចេញលម្អងផ្កា ឬលម្អងឈើផ្សេងៗជាដើម។

2 .មកពីធូលី រោមសត្វ តំណពូជ និងសារធាតុផ្សេងៗ ដែលមាននៅក្នុងផ្ទះរបស់លោកអ្នក ជាហេតុដែលធ្វើឱ្យលោកអ្នកកើតមានជម្ងឺអាឡែកស៊ីច្រមុះបាន។

រោគសញ្ញា និងរោគវិនិច្ឆ័យជម្ងឺអាឡែកស៊ីច្រមុះ
រោគសញ្ញាដែលបង្ហាញឱ្យដឹងថាជាជម្ងឺអាឡែកស៊ីច្រមុះ មានដូចជាក្អកក្រដាសច្រើននៅពេលព្រឹក តឹងច្រមុះ រមាស់ច្រមុះ ហៀរសម្បោរ ហើយការហៀរសម្បោរដំបូងជាទឹកថ្លា ក្រោយមកអាចទៅជាខាប់។ ការខាប់ដោយសារតែមានការរលាកបន្ថែម វាធ្វើឱ្យរមាស់ភ្នែក រមាស់ក្រអូមមាត់ រមាស់ក ឈឺក អាចមានស្លេស្មច្រើន អាចមានឈឺក្បាល នេះសុទ្ធសឹងជារោគសញ្ញាជម្ងឺអាឡែកស៊ីច្រមុះ។

-ផលប៉ះពាល់របស់ជម្ងឺអាឡែកស៊ីច្រមុះ

ផលប៉ះពាល់នៃជម្ងឺអាឡែកស៊ីច្រមុះគឺមានច្រើន ប្រសិនជាលោកអ្នកមិនយកចិត្ដទុកដាក់ក្នុងការព្យាបាលទេអាចមានផលវិបាកជាមិនខាន។ ឧទាហរណ៍ករណីការរលាកច្រមុះ ហើយការរលាកច្រមុះអាចធ្វើឱ្យរលាកដល់ទីនីស ព្រោះទីនីសគឺជាឆ្អឹងប្រហោងក្នុងដែលស្ថិតនៅជុំវិញច្រមុះរបស់មនុស្សដែលមានទីនីសច្រើន មានដូចជានៅថ្គាម ថ្ងាស នៅចន្លោះភ្នែកច្រមុះ និងស្ថិតពីក្រោយច្រមុះ។ នៅពេលដែលមានការរលាកច្រមុះ ឬរលាកទីនីសអាចធ្វើឱ្យកើតជាឫសដូងច្រមុះ ដែលអាចប៉ះពាល់ទៅដល់ត្រចៀក រហូតធ្វើឱ្យរលាកត្រចៀកកើតជាអំបៅអំបែក អាចប៉ះពាល់ដល់ភ្នែក ប៉ះពាល់ទៅដល់សើស្បែក បង្កទៅជាកន្ទាលក្រហម ជាំ ជួនកាលអាចកើតជាហឺតបានដែរ។ មិនត្រឹមតែប៉ុណ្ណឹងទេ កាលណាដែលលោកអ្នកកើតមានជម្ងឺនេះ វាអាចធ្វើឱ្យមានផលប៉ះពាល់ទៅដល់ការងារប្រចាំថ្ងៃ ការសិក្សារៀនសូត្រ ព្រោះវាធ្វើឱ្យលោកអ្នកអស់កម្លាំង ឈឺក្បាល ទទួលទានដំណេកមិនបាន ហើយផលវិបាកមួយទៀតគឺខាងថវិកាទៀត។

-វិធីការពារជម្ងឺអាឡែកស៊ីច្រមុះ

វិធីការពារដើម្បីទទួលបានប្រសិទ្ធភាពបំផុតនោះ លោកអ្នកគួរចៀសវាង មិនត្រូវប៉ះពាល់ឬស្រូបនូវសារធាតុផ្សេងៗ ដែលបង្កឱ្យកើតជម្ងឺអាឡែកស៊ីនេះ។ ពេលចេញដើរទៅណាមកណាត្រូវពាក់ម៉ាសការពារឱ្យបានខ្ជាប់ខ្ជួន នៅផ្ទះត្រូវបិទបង្អួចដើម្បីកុំឱ្យសារធាតុផ្សេងៗ ឬធូលីចូលបានតាមរយៈខ្យល់ ត្រូវសម្អាតផ្ទះឱ្យបានស្អាតបាត។ ហើយសម្រាមនៅពេលដែលលោកអ្នកបោសត្រូវខ្ចប់ឱ្យបានត្រឹមត្រូវ ជាពិសេសត្រូវមានអនាម័យខ្លួនជានិច្ច។